പൂക്കാലം

 

മനോഹരമായ, ജീവിതമുള്ള ഒരു കുടുംബ കഥയാണ് പൂക്കാലം എന്ന സിനിമ.ഹാസ്യത്തിൻ്റെ മേമ്പൊടി ചേർത്തു പ്രേക്ഷകരെ പിടിച്ചിരുത്തുന്ന ഒരു കുടുംബ കഥ.

ഇന്ന് പല വീടുകളിലും കാണാത്ത ബന്ധങ്ങളുടെ അടുപ്പവും ,ഒരുമയും കാണുമ്പോൾ ഇവരൊക്കെ നമ്മുടെ ബന്ധുക്കളോ സുഹൃത്തുക്കളോ ആണെന്ന് പ്രേക്ഷകർ ചിന്തിക്കുന്ന ഇടത്താണ് സിനിമ വിജയത്തിലേക്ക് കൈ പിടിച്ചു മെല്ലെ നടക്കുന്നത്.

ഏകദേശം 100വയസ്സായ ഇട്ടൂപ്പ് , ഭാര്യ കൊച്ചു ത്രേസ്യയെ,80 വർഷത്തെ ദാമ്പത്യത്തിന് ശേഷവും പ്രണയിച്ചു മതിയായില്ല . വിജയ രാഘവൻ, കെ പി എ സി ലീല ,ജഗദീഷ് എന്നിവർ എടുപ്പിലും നടപ്പിലും സംസാരത്തിലും വൃദ്ധരായി പകർന്നാട്ടം നടത്തി. മേക്കപ്മാൻ ronex ന് വലിയ കയ്യടി.

ബേസിൽ,വിനീത് ശ്രീനിവാസൻ ,സുഹാസിനി തുടങ്ങിയവരെല്ലാം മൂന്ന് വൃദ്ധരുടെ മുന്നിൽ ആരും അല്ലെന്ന് തെളിയിച്ചു.

കൊച്ചുമകളായ അന്നയുടെ മനസ്സമ്മതത്തിന് എല്ലാവരും ഒത്തു ചേർന്നപ്പോൾ വീട്ടിൽ ഉത്സവപ്രതീതിയാണ്.അശിനിപാതം പോലെ ഇട്ടൂപ്പിൻ്റെ മനസ്സിലേക്ക് സംശയം കടന്നു വന്നത് ഒരു കത്തിൻ്റെ രൂപത്തിലാണ്.കൊച്ചുത്രേസ്യയുടെ മൗനം വീട്ടുകാരെ പ്പോലെ പ്രേക്ഷകരെയും ചുറ്റിപ്പിക്കും.

വിശ്വാസ വഞ്ചന സഹിക്കാൻ തയ്യാറല്ലാത്ത ഇട്ടൂപ്പ് വിവാഹമോചനം എന്നതിൽ ഉറച്ചു നിൽക്കുന്നു. മക്കളെല്ലാം ശ്രമിച്ചിട്ടും മനസ്സ് മാറാൻ തയ്യാറല്ലാത്ത ഇട്ടൂപ്പിന് എവിടെയോ അഞ്ഞൂറാൻ്റെ ഛായ തോന്നി.

ഭൂതകാലത്തെ ചില സംഭവങ്ങൾ ,ഇതുപോലെ പല കുടുംബങ്ങളിലും ഒളിഞ്ഞു കിടക്കുന്നുണ്ടാവാം. .തിരക്കഥയുടെ മേന്മകൊണ്ട്, കൈവിട്ടുപോകാൻ ഏറെ സാധ്യതയുള്ള ഒരു കഥയ്ക്ക് പ്രതീക്ഷിക്കാത്ത ഒരു ക്ലൈമാക്സ് കൊടുത്തു കൊണ്ട് ഒരു ഫീൽ ഗുഡ് movie ആക്കിയ അണിയറ പ്രവർത്തകർക്ക് അഭിനന്ദനങ്ങൾ. ഛായാഗ്രഹണം, സംവിധാനം,സംഗീതം ഒക്കെ ചിത്രത്തിന് ചേരുന്ന രീതിയിൽ അവതരിപ്പിച്ചു.ഒരു വലിയ കുടുംബത്തിൻ്റെ ഊഷ്മളമായ ബന്ധത്തിൻ്റെ ഇഴയടുപ്പം പ്രമേയമാക്കിയത് കൊണ്ടാവും കുടുംബ പ്രേക്ഷകർ ഇഷ്ടത്തോടെ കണ്ടിരിക്കും.

സുമ ശങ്കർ